نشتر ہسپتال لاشیں برآمدگی معاملہ ،غفلت برتنے پر تین ڈاکٹرز، تین ملازمین ،متعلقہ تھانوں کے ایس ایچ اوز معطل
لاشیں چھت پر پھینک کر غیر انسانی فعل کا ارتکاب کیا گیا’وزیر اعلیٰ چوہدری پرویز الٰہی کی زیر صدارت اعلیٰ سطحی اجلاس
لاہور ( پوائنٹ پاکستان) وزیر اعلیٰ پنجاب نے نشتر ہسپتال ملتان کی چھت پر لاشوں کی برآمدگی کے معاملے پر ایکشن لیتے ہوئے غفلت برتنے پر تین ڈاکٹرز، تین ملازمین اور متعلقہ تھانوں کے دو ایس ایچ اوز کو معطل کردیا۔وزیر اعلیٰ چوہدری پرویز الٰہی کی زیر صدارت اعلی سطح کا اجلاس ہوا، جس میں نشتر ہسپتال میں لاشیں پھینکنے کے واقعہ سے متعلق رپورٹ پیش کی گئی۔وزیراعلیٰ پنجاب نے غفلت برتنے پر تین ڈاکٹرز، تین ملازمین اور متعلقہ تھانوں کے دو ایس ایچ اوز معطل کردئیے۔معطل ڈاکٹرز میں ڈاکٹر مریم، ڈاکٹرعبدالوہاب اور ڈاکٹر سیرت عباس شامل ہیں، جبکہ ایس ایچ او تھانہ شاہ رکن عالم اور ایس ایچ اوتھانہ سیتل ماڑی بھی معطل کردئے گئے ہیں۔ نشترمیڈیکل یونیورسٹی کے ملازمین غلام عباس، سجاد ناصر اورعبدالرف کو بھی معطل کیا گیا ہے۔وزیراعلی نے غفلت کے ذمہ داروں کے خلاف پیڈا ایکٹ کے تحت کارروائی کا حکم دیتے ہوئے کہا کہ کسی صورت لاشوں کے ساتھ ایسا برتا قبول نہیں، لاشیں چھت پر پھینک کر غیر انسانی فعل کا ارتکاب کیا گیا۔
