اسلام آباد:(پوائنٹ پاکستان) فیڈرل انویسٹیگیشن ایجینسی (ایف آئی اے) نے صحافی محسن بیگ کو گرفتار کر لیا۔
تفصیلات کے مطابق ایف آئی اے سائبر کرائم ونگ نے سنیئر صحافی محسن بیگ کے گھر چھاپا مار کر گرفتار کر لیا جبکہ محسن بیگ کے صاحبزادے نے بھی ان کی گرفتاری کی تصدیق کر دی ہے۔
دوسری جانب اسلام آباد پولیس کے ترجمان کا اس حوالے سے کہنا ہے کہ وفاقی تحقیقاتی ادارے ( ایف آئی اے) کی ٹیم محسن بیگ کی گرفتاری کے لیے ان کے گھر گئی،گرفتاری کے دوران ایف آئی اے کی ٹیم کے ساتھ مزاحمت ہوئی اور محسن بیگ نے فائرنگ کی، فائرنگ سے ایف آئی کا ایک جوان زخمی ہو گیا۔
ترجمان اسلام آباد پولیس نے مزید بتایا کہ صحافی محسن بیگ کو تھانہ منتقل کر دیا گیا ہے اور مزید قانونی کارروائی جاری ہے۔
سنیئر صحافی محسن بیگ کے وکیل راحیل قریشی نے غیر قانونی حراست کے خلاف اسلام آباد ہائی کورٹ میں درخواست دائر کر دی ہے ۔
راحیل قریشی کا کہنا ہے کہ بدھ کی صبح سویرے سادہ کپڑوں میں ملبوس مسلح افراد محسن بیگ کے گھر آئے، کون لوگ تھے کہاں لے کر جا رہے تھے کچھ معلوم نہیں تھا ، ایس پی اور ڈی ایس پی سے وارنٹ گرفتاری اور سرچ وارنٹ مانگے گئے جو نہیں دیے گئے۔
وکیل راحیل قریشی نے میڈیا کو مزید بتایا کہ ایس پی نے سادہ کپڑوں میں ملبوس افراد کو گھر میں دھاوا بولنے کا حکم دیا، سادہ کپڑوں میں ملبوس اہلکاروں نے بچوں کو مارا، موبائل فون توڑ دیے اور محسن بیگ کو ساتھ لے گئے۔
