اسلام آباد(پوائنٹ پاکستان ) ذرائع کے مطابق پٹرول کی قیمت 224.80 روپے فی لیٹر سے کم ہوکر 214.69 روپے پر آسکتی ہے جبکہ ہائی اسپیڈ ڈیزل کے دام 235.30 روپے فی لیٹر سے گھٹ کر 221.33 روپے پر آجانے کا امکان ہے۔ تاہم ایسا اسی وقت ممکن ہوگا کہ جب حکومت پٹرولیم لیوی نہ بڑھائے اور بقایاجات ایڈجسٹ کرنے سے بھی باز رہے۔دوسری جانب پٹرولیم ڈویژن کے ذرائع کا کہنا ہے کہ حکومت کی جانب سے ہائی اسپیڈ ڈیزل، سپیریئر کیروسین آئل اور لائٹ ڈیزل آئل پر پٹرولیم لیوی بڑھائے جانے کا امکان ہے۔اس کے علاوہ یہ توقع بھی ہے کہ دسمبر کے نصف آخر کے لیے ایکسچینج نقصانات کے بقایاجات کو پٹرولیم نرخوں میں ایڈجسٹ کردیا جائے گا، اس صورت میں پٹرول اور ہائی اسپیڈ ڈیزل کی قیمتوں میں کمی کا امکان بہت کم رہ جائے گا۔حکومت نے آئی ایم ایف کو یقین دہانی کرائی تھی کہ تمام پٹرولیم مصنوعات پر پٹرولیم لیوی کی انتہائی حد (50روپے فی لیٹر)نافذ ہوجانے کے بعد وہ ان پر جنرل سیلز ٹیکس بھی نافذ کردے گی۔اس وقت حکومت پٹرول پر 50 روپے، ہائی اسپیڈ ڈیزل پر 25 روپے، سپیریئر کیروسین آئل پر 7.01روپے اور لائٹ ڈیزل آئل پر 15.39روپے فی لیٹر پٹرولیم لیوی وصول کررہی ہے۔حکومت نے انٹرنیشنل مانیٹری فنڈ سے اپریل 2023 تک ہائی اسپیڈ ڈیزل پر پٹرولیم لیوی بڑھاکر 50 روپے فی لیٹر کردینے کا وعدہ بھی کیا ہے۔
