لاہور(پوائنٹ پاکستان)تفصیلات کے مطابق رہنما پی ٹی آئی مسرت جمشید چیمہ نے کہا ہے کہ الیکشن کمیشن نے محسن نقوی کی تعیناتی کر کے اپنے جانبدار اور نااہل ہونے پر ایک اور مہر ثبت کر لی ہے۔ ٹوئٹر پر اپنے پیغام میں مسرت جمشید چیمہ کا کہنا تھا کہ محسن نقوی پر نیب کیسز بھی ہیں اور وہ سیاسی طور پر متنازعہ بھی ہے، ایسا شخص جو مبینہ طور پر زرداری کا فرنٹ مین ہو اس کو لانے کا مقصد صرف عوام کے مینڈیٹ پر ڈاکہ ڈالنا ہے۔رہنما پی ٹی آئی نے مزید کہا کہ اس تعیناتی پر ہم سڑکوں پر بھی جائیں گے اور قانون کا دروازہ بھی کھٹکھٹایا جائے گا، انہیں ناصرف وقت پر الیکشن کروانا ہوں گے بلکہ عوام انہیں دھاندلی کی اجازت بھی نہیں دیں گے۔
