لاہور(پوائنٹ پاکستان )تفصیلات کے مطابق ملک میں بدلتی سیاسی صورتحال پر قائد مسلم لیگ ن کی پارٹی رہنمائوں سے مشاورت جاری ہے،ذرائع کے مطابق وزیر داخلہ رانا ثنا اللہ کی آئندہ دو روز میں لندن روانگی متوقع ہے، ملاقات میں وزیر داخلہ کو ملک کی سیاسی صورتحال میں اہم ٹاسک دیئے جانے کا امکان ہے، رانا ثنا اللہ قائد مسلم لیگ ن نواز شریف کو پنجاب اسمبلی میں پیدا ہونے والی صورتحال پر اعتماد میں لیں گے۔اس موقع پر سینئر نائب صدر مسلم لیگ ن مریم نواز کی وطن واپسی سے متعلق امور کا بھی جائزہ لیا جائے گا، لندن میں ہونے والی مشاورت میں مسلم لیگ ن کی سینئر نائب صدر مریم نواز بھی شامل ہوں گی۔ذرائع کا کہنا ہے کہ ملاقات کے دوران عدالتوں میں کیسز اور آئندہ کی پیش رفت پر بھی غور کیا جائے گا۔یاد رہے کہ اس سے قبل سیاسی صورتحال پر قائد مسلم لیگ ن نواز شریف نے سردار ایاز صادق اور خواجہ آصف سے بھی سیاسی امور پر مشاورت کی ہے جس میں ملک میں عام انتخابات جلد کروانے سے متعلق امور کا بھی جائزہ لیا گیا۔
