لاہور (پوائنٹ پاکستان) راوی شہر میں دریا کی بحالی کیلئے کام جاری ، گندہ پانی صاف کرکے راوی میں ڈالنے کیلئے امریکی کمپنی جلد کام شروع کردیگی ۔ تفصیلات کے مطابق امریکی (بائیو کلینر)سرمایہ کار کمپنی نے روڈا ہیڈ کوارٹر میں سی ای او روڈا عمران امین سے ملاقات کی اور ویسٹ واٹر ٹریٹمنٹ پلانٹ کے حوالے سے پروجیکٹ امور پر گفت و شنید کی ۔ملاقات میں کاشف قریشی ایگزیکٹو ڈائریکٹرکمرشل ، عبد الوحید خا ن ای ڈی انجینئرنگ ، عثمان احمد ای ڈی سمارٹ سٹی اورعابد لطیف ڈائریکٹر تعلقات عامہ بھی موجود تھے ۔
دوران ملاقات مسٹر اروس سربراہ امریکی کمپنی نے سی ای او روڈا کو پراجیکٹ کی مختلف توجیہات سے آگاہ کیا اور بتایاکس طرح گندہ پانی صاف ہوکر پینے کے قابل ہو جائیگا۔روڈا ایریا میں دریاکنارے لگنے والے ان ٹریٹمنٹ پلانٹ میں عالمی معیار کی ٹیکنالوجی استعمال کی جائیگی ۔یہ ویسٹ واٹر ٹریٹمنٹ پلانٹ راوی کے مختلف مقامات محمو دبوٹی ، شادباغ اور شاہدر ہ میں لگائیں جائیں گے جہاں پرروزانہ 1100کیوسک گندے پانی کوکشید کر کے دریا میں ڈالا جائے گا ان منصوبوں پر مجموعی طور پر 80ارب کی لاگت آئیگی ۔ امریکی کمپنی کے اس ماحول دوست منصوبے سے راوی شہر میں سیر وسیاحت،کشتی رانی اور مچھلی کے کاروبا ر کو فروغ ملے گا ۔ ملاقات کے اختتام پر عمران امین سی ای او روڈا نے مسٹر اروس سی ای او امریکی کمپنی کا شکریہ ادا کیا اور روڈا شیلڈ بھی پیش کیں۔
