لاہور:(پوائنٹ پاکستان) بھارت میں یوٹیوب نے گلوکار سدھو موسے والا کے آخری گانے ( SYL) کو اپنے پلیٹ فارم سے ہٹا دیا ہے، گانا 23 جون کو ریلیز کیا گیا تھا۔
بھارتی میڈیا کی رپورٹ کے مطابق سدھو موسے والا کا پنجاب کے پانی کے مسئلے پر بنایا گیا آخری گانا SYL بھارت میں یوٹیوب سے ہٹا دیا گیا ہے۔ بھارتی حکومت کی جانب سے قانونی شکایت کی وجہ سے یہ مواد کنٹری ڈومین پر دستیاب نہیں ہے یعنی سدھو کا یہ گانا بھارت میں دستیاب نہیں ہے۔
سوشل میڈیا پر ایک اسکرین شاٹ شیئر بڑا وائرل ہو رہا ہے جوکہ سدھو موسے والا کے آخری گانے کا لنک تھا جس پر لکھا تھا کہ ویڈیو دستیاب نہیں ہے۔
دوسری جانب پاکستان سمیت دنیا کے دیگر ممالک میں سدھو موسے والا کا آخری گانا SYL یوٹیوب پر موجود ہے۔
سدھو موسے والا کے اس گانے کو اب تک 28 ملین سے زائد افراد یوٹیوب پر سُن چکے ہیں۔
واضح رہے کہ اس گانے کو خود سدھو موسے والا نے آخری بار گایا، لکھا اور کمپوز کیا اور جیسے ہی یہ گانا ریلیز ہوا تو مداح بہت زیادہ جذباتی ہوگئے تھے۔
