کراچی : ( پوائنٹ پاکستان) مرحوم ڈاکٹر عامر لیاقت حسین کی موت کی حقیقی وجوہات جاننے کے لیے ان کی قبر کشائی 23 جون کی صبح ساڑھے 9 بجے ہوگی جس کا باقاعدہ نوٹیفکیشن بھی جاری کردیا گیا ہے۔ نوٹیفکیشن کے مطابق 6 رکنی میڈیکل بورڈ میں ایڈیشنل پولیس سرجن شاہد نظام،ایڈیشنل پولیس سرجن عباسی شہید اسپتال ڈاکٹر شاہد نظام، ایچ او ڈی فرانزک میڈیسن جناح پرویز مخدوم، ، شہید محترمہ بے نظیر بھٹو میڈیکل یونیورسٹی لیاری کے شعبہ فرانزک میڈیسن کے اسسٹنٹ پروفیسر ڈاکٹر ہری رام لوہانا، سول اسپتال کراچی کے میڈیکو لیگل آفیسر ڈاکٹر گلزار علی سولنگی اور جناح پوسٹ میڈیکل کالج کے میڈیکو لیگل آفیسر ڈاکٹر محمد اریب بکھائی شامل ہیں جس کی سربراہی پولیس سرجن ڈاکٹر سمیعہ کریں گی۔
خیال رہے کہ عامر لیاقت کی تدفین کے چند روز بعد عدالت میں ایک درخواست دائر کی گئی تھی جس میں مؤقف اختیار کیا گیا کہ عامر لیاقت کو جائیداد کے لیے ممکنہ طور پر قتل کیا گیا ہے۔عدالت میں عامر لیاقت کا پوسٹ مارٹم کروانے کی درخواست شہری عبد الاحد کی جانب سے دائر کی گئی تھی۔درخواست گزار عبد الاحد کا کہنا ہے کہ عامر لیاقت ایک معروف ٹی وی اینکر اور سیاست دان تھے، ان کی اچانک موت سے کراچی کے شہریوں میں شکوک و شبہات پائے جاتے ہیں۔درخواست گزار کا کہنا تھا کہ اِنہیں شک ہے کہ جائیداد کے تنازع پر انہیں قتل کیا گیا ہے، اس لیے ان کا پوسٹ مارٹم کرایا جائے تاکہ ان کی موت کی وجہ سامنے آسکے۔
اس لئے ان کی موت کی وجوہات کے تعین کے لیے پوسٹ مارٹم کیا جائے، جس کے بعد 18 جون کو کراچی کی ماتحت عدالت نے عامر لیاقت کی قبر کشائی اور پوسٹ مارٹم کا حکم دیا تھا۔ عامر لیاقت حسین 9 جون کو کراچی میں انتقال کرگئے تھے، ان کی تدفین 10 جون کو ہوئی تھی۔
