پوائنٹ پاکستان:( ویب ڈیسک) پشاور میں اتوار کے روز نامعلوم موٹر سائیکل سواروں کی فائرنگ سے پادری ولیم کے جاں بحق ہونے پر واقعے پر آرچ بشپ راولپنڈی اسلام آباد بشپ ڈاکٹر جوزف ارشد اور قومی کمیشن برائے امن و انصاف کے ڈائریکٹر ریورنڈ فادر سرفراز سائمن نے شدید الفاظ میں مذمت کی ہے ۔
آرچ بشپ ڈاکٹر جوزف ارشد اور سرفراز سائمن نے حکومت سے مطالبہ کیا کہ جسٹس ریٹائرڈ تصدق حسین جیلانی کی پیش کردہ رپورٹ کی روشنی میں اقلیتوں کی عبادت گاہوں اور مذہبی قیادت کی حفاظت کے مناسب انتظامات کرے۔
آرچ بشپ ڈاکٹر جوزف ارشد کا کہنا تھا کہ جسٹس تصدق حسین جیلانی کی پیش کردہ رپورٹ کی شق نمبر 5 جو کہ اقلیتوں کی عبادت گاہوں کی حفاظت کے بارے میں بات کرتی ہے پر فوری طور پر عملدرآمد کیا جانا چاہئے،انہوں نے مزید کہا کہ ہم پادری پیٹرک نعیم اور ساتھی ولیم سراج پر حملے کی شدید مذمت کرتے ہیں اور متاثرہ مسیحی پادریوں کے اہل خانہ سے یکجہتی کا اظہار کرتے ہیں۔
ڈائریکٹر قومی امن و انصاف کمیشن ریورنڈ فادر سرفراز سائمن کا کہنا تھا کہ پادریوں پر حملے نے پاکستان میں تمام مسیحی برادری کو تشویش میں مبتلا کر دیا ہے۔ جو لوگ بھی اس واقعے میں ملوث ہیں، انہیں جلد از جلد بے نقاب کرکے انصاف کے کٹہرے میں لا کر قرار واقعی سزا دیتے ہوئے نشان عبرت بنایا جائے۔
خیال رہے اتوار کے روز پشاور رنگ روڈ پر نامعلوم موٹر سائیکل سواروں کی فائرنگ سے پادری ولیم سراج موقع پر جاب بحق جبکہ ان کے ساتھی پیٹرک نعیم زخمی ہو گئے تھے۔گل بہار پولیس اسٹیشن کی رپورٹ کے مطابق فائرنگ کا یہ واقعہ اتوار کے روز پشاور میں رنگ روڈ پر واقع مدینہ مارکیٹ کے پاس دوپہر ڈیڑھ بجے کے قریب اس وقت پیش آیا جب دونوں پادری صاحبان آل سینٹ چرچ میں عبادات ختم ہونے کے بعد گھر جا رہے تھے۔
